O presidente da RAG prestoulles especial atención ás publicacións periódicas nas que Florencio Delgado Gurriarán participou dende o exilio, Saudade e Vieiros. Víctor F. Freixanes lembrou ademais que a Academia escolleu o poeta como protagonista do Día das Letras Galegas 2022 en recoñecemento das súas calidades literarias e persoais, e tamén como a primeira homenaxe desta celebración á lingua e a cultura de Valdeorras e ao exilio galeguista en México. Xesús Alonso Montero detívose nas vicisitudes da publicación do Cancioneiro da loita galega, que non chegou a Galicia ata despois do franquismo; e Xosé Ramón Pena analizou os “poemas mexicanos” de Delgado Gurriarán.

O Teleclub de Petín foi o escenario da mesa de historia, na que Telmo Fernándes Gonçálves falou do papel de Florencio na organización dos barcos da liberdade dende Francia; Aurora Marco dedicou a súa intervención ás mulleres na guerra e na posguerra en Valdeorras; e Camilo Valdehorras analizou a relación de Florencio coa Xeración Nós e os atrancos na transmisión da galeguidade no exilio mexicano.

Xa na mesa sobre o idioma, a académica Rosario Álvarez, directora da Sección de Lingua da RAG e presidenta do Consello da Cultura Galega, analizou o galego de Delgado Gurriarán dende tres perspectivas: a raíz, a tradición e a universalidade. A doutora en filoloxía vianesa Concepción Álvarez, especialista na fala valdeorresa, debullou o universo léxico de Florencio marcado pola pegada da súa terra e o historiador Francisco Cobo mostrouse crítico co tratamento dos termos valdeorreses nas reedicións da obra do autor ao que este ano a Real Academia Galega dedicou o 17 de maio.
A última mesa, centrada na arte, celebrouse en Rubiá e estivo protagonizada polos creadores Domingo Díaz Docampo, Raquel Queizás e Sr. Jingles.