Un concerto conmemorativo poralle o ramo o vindeiro luns aos XXX Cursos de lingua e cultura galegas

O Paraninfo da Universidade de Santiago de Compostela (USC) acollerá o vindeiro luns 24 de xullo, ás 11:00 horas, a cerimonia de clausura dos Cursos de lingua e cultura galegas "Galego sen fronteiras", organizados pola Real Academia Galega coa colaboración do Instituto da Lingua Galega da USC e o apoio da Deputación da Coruña e a Secretaría Xeral de Política Lingüística. No acto celebraranse os trinta anos de vida deste programa contando como convidado especial cun dos alumnos das primeiras edicións, o profesor xaponés Takekazu Asaka, auténtico embaixador da cultura galega no seu país, e cun concerto conmemorativo a cargo de dous compatriotas, a soprano Miho Haga e da pianista Yukiko Yamagami, que interpretarán poemas de autores galegos e cancións populares de noso.

Alumnado da trixésima edición dos Cursos de lingua e cultura galegas durante un roteiro musical por Santiago de Compostela


Takekazu Asaka intervirá na cerimonia xunto ao presidente da Real Academia Galega, Víctor F. Freixanes; o reitor da USC, Juan Viaño; o académico e codirector dos cursos Xosé Luís Regueira; e o secretario xeral de Política Lingüística, Valentín García Gómez e o secretario do ILG, Francisco Dubert.

No acto entregaránselles os seus diplomas ás máis de 80 persoas, procedentes dunha vintena de países de Europa, América, Asia e Oceanía que participan nesta edición. Desde a súa creación en 1988, polos cursos pasaron máis de 2.600 estudantes de todo o mundo. Nas súas aulas aprenderon a nosa lingua moitas das persoas que hoxe verten a outros idiomas a nosa literatura e referentes nos estudos galegos a nivel internacional, como é o propio Takakazu Asaka, autor da primeira gramática galega para xaponeses e tradutor ao xaponés de Rosalía e outros autores das nosas letras.

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar