Sesión de tarde do Simposio Vidal Bolaño

Nesta segunda parte do faladoiro, alén de proseguir a pescuda da súa obra, pasouse revista aos eventos máis destacados do Ano Vidal Bolaño.
Alonso Montero e Valentín García
Alonso Montero e Valentín García


O profesor e xefe de estudos da Escola Superior de Arte Dramático e director da Mostra Internacional de Teatro de Ribadavia, Roberto Pascual, foi o encargado de realizar unha revisión e valoración dos actos máis relevantes celebrados este ano arredor da figura de Vidal Bolaño cun discurso titulado "Tempo de seitura". Roberto Pascual principiou o seu discurso lamentando a falta de proxección exterior da nosa cultura: "Resulta sintomática a escasa repercusión que a escolla de Roberto Vidal Bolaño para o Día das Letras Galegas tivo fóra de Galicia". Porén, o profesor valorou positivamente o tratamento que a figura de Vidal Bolaño recibiu na conmemoración do corenta aniversario da fundación da Mostra de Teatro Abrente: "En Abrente Roberto deu os seus primeiros pasos no teatro galego coa consecución do premio de creación en 1976 pola obra Laudamuco, e naquel fervedoiro cultural, Vidal Bolaño toma conciencia da necesidade de escribir teatro sobre a realidade dun pobo oprimido empregando recursos provenientes da súa tradición parateatral e antropoloxía cultural, de aí o nome da súa primeira compañía teatral: Antroido".

Inma López Silva e Roberto Pascual
Inma López Silva e Roberto Pascual


Roberto Pascual salientou tamén o papel da Escola Superior de Arte Dramático na difusión da obra do dramaturgo santiagués ao longo de todo o ano, a posta en marcha da Asociación Vidal Bolaño, a creación do vídeo documental Telexornal Vidal Bolaño por parte dos alumnos do CPI dos Dices de Rois, o éxito das producións do reconstituído Teatro Antroido, a posta en escena, por parte do Centro Dramático Galego das obras Días sen groria e Criaturas, se ben a súa execución non lle mereceu un xuízo favorable, así como a Procesión Santa Bolaña.

No eido da produción editorial, Pascual salientou a publicación en Galaxia da obra Un chapeu negro e un nariz de pallaso, e das súas Obras Completas I, II e III a cargo de Positivas, así como o monográfico Poder Obreiro editado pola Central Unitaria de Traballadores/as, a edición facsimilar da Ruada das papas e o unto, feita polo Consello da Cultura, e as monografías de Camilo Franco e Afonso Becerra sobre o autor compostelán.

Carlos Biscainho, Gustavo Pernas, Afonso Becerra e Xulio Lago
Carlos Biscainho, Gustavo Pernas, Afonso Becerra e Xulio Lago


Na súa caracterización da obra bolañiana, o dramaturgo Xulio Lago salientou, como trazos distintivos, a súa orixinalidade, humor, a profundidade dos seus personaxes, o uso de referentes espaciais galegos así como a vixencia e actualidade das súas temáticas favoritas hoxe en día. Para Xulio Lago, o talento dramatúrxico de Vidal Bolaño manifestouse con grande eficacia na súa posta en escena de obras consideradas irrepresentables: "Cando Roberto representa Xelmirez, de Cortezón ou a Rosalía de Pedrayo, amosa que esas catedrais do teatro imposible eran obras aptas de seren levadas ás táboas".

"Compostela é hoxe unha cidade bolañesa", deste xeito resumiu o profesor e dramaturgo Gustavo Pernas a potencia estética dos dramas de Vidal Bolaño. Para este dramaturgo, o territorio conflitivo de confluencia entre o individual e o colectivo é o verdadeiro motor creativo dos dramas do de Vista Alegre, e engadiu, "Roberto escribiu papeis desde a escena que logo han permanecer nun libro", para subliñar a concepción integral do drama nun autor, o compostelán, que esborralla decote a fronteira entre o textual e o escénico. O tempo do Franquismo serodio e o fracaso das utopías cinguidas no albor da Transición son outros tópicos predilectos dun autor empeñado en reflectir "o significado sintomático da nosa época".

O profesor e director escénico Afonso Becerra defendeu na súa intervención a liñaxe aristotélica dos dramas bolañianos: "Roberto escribe pezas con principio e fin, con pés e cabeza, e aínda que usa unha estrutura fragmentaria, esabe dosificar a información para ir creando un efecto de suspense na audiencia, como nos filmes do cine negro, o que nos conta, ao cabo, son historias dramatizadas". Para Afonso Becerra, a inclusión da análise do acontecido mediante analepses que regresan, unha e outra vez, sobre unha mesma situación, e o uso de recursos tirados da tradición predramática, da parte máis dionisíaca do teatro, son os trazos máis interesantes da obra dramática do autor compostelán.

Tras da proxección do documental Recuperando a Vidal Bolaño, de Gonzalo Enríquez Veloso, o presidente da Academia, Xesús Alonso Montero, e o director xeral de Política Lingüística, Valentín García déronlle o albaroque ao Simposio, subliñando a importancia do legado de Vidal Bolaño no seu esforzo permanente por construír e dignificar o noso teatro.

Imaxe dos asistentes ao acto
Unha imaxe do debate posterior ás ponencias


Máis imaxes en Fotogalerías.

Dicionario
Axenda de actos Ver todos
Sábado 23 de setembro de 2017 / 12:00 h
Ingreso de Chus Pato como académica numeraria da RAG - Ourense
Sábado 30 de setembro de 2017 / 9:30 h
II Xornada de onomástica galega: Os nomes e apelidos - Museo de Pontevedra

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar