Sesión de mañá do Simposio Vidal Bolaño

Ao longo desta xornada, que puxo o ramo ao Ano Vidal Bolaño, diversos especialistas analizaron os aspectos máis relevantes da obra do dramaturgo compostelán.
Vázquez Abad, Alonso Montero e María Jesús Lorenzo Modia
Vázquez Abad, Alonso Montero e María Jesús Lorenzo Modia


A primeira parte do simposio, celebrada no Salón de Actos da Facultade de Filoloxía da Universidade da Coruña, contou coa presenza, entre outros, do conselleiro de Educación e Cultura, Jesús Vázquez Abad; do secretario xeral de Cultura, Anxo Lorenzo; da decana da Facultade de Filoloxía, María Jesús Lorenzo Modia e do presidente da Real Academia Galega, Xesús Alonso Montero.

No seu discurso inaugural, o presidente da Academia, logo de lle agradecer á Consellería de Educación e Cultura a súa colaboración e axuda económica para a celebración do Simposio, describiu o Ano Vidal Bolaño como unha edición "especialmente farturenta" do Día das Letras a xulgar polo número de edicións, estudos e representacións da obra do dramaturgo compostelán. "Curiosamente, a celebración do Ano Vidal Bolaño coincidiu tamén co corenta aniversario das Xornadas de Teatro Abrente de Ribadavia onde a figura de Vidal Bolaño emerxeu como unha luminaria, de tal maneira que este ano celebramos dúas efemérides moi importantes para o teatro galego", concluíu o presidente.

Na súa intervención, o conselleiro de Educación e Cultura, Jesús Vázquez Abad, manifestou a necesidade de "mantermos viva a memoria de Vidal Bolaño", e salientou, entre as características máis singulares do autor protagonista do Día das Letras 2014, o seu afán renovador, autenticidade e compromiso, "a súa actitude crítica axúdanos a facer medrar en calidade a nosa democracia", rematou sinalando o conselleiro.

Iolanda Ogando
Iolanda Ogando

A seguir, os coordinadores do Simposio, os profesores Dolores Vilavedra, Inma López Silva e Carlos Biscainho, deron paso á primeira das conferenciantes, a profesora da Universidade de Estremadura Iolanda Ogando quen, cun discurso titulado "Encarnar o país: Galiza e as súas xentes na obra de Vidal Bolaño", definiu a obra do dramaturgo de Vista Alegre como "unha tentativa de construír o país". En palabras da profesora Ogando, Vidal Bolaño "empregou unha multitude de recursos que o axudaron a representar e encarnar o país", como parte dun proxecto máis amplo encamiñado a "construír un teatro nacional galego, traballando arreo para facer posible a súa profesionalización e concibindo o teatro como unha ferramenta didáctica para construír e divulgar unha identidade propia". Para Iolanda Ogando, a obra de Vidal Bolaño, marcada pola súa vontade de compromiso, intervención e participación, tivo sempre "vontade de espellar o país", e con esta finalidade empregou diversas estratexias e temas tirados da nosa historia, memoria colectiva e cultura popular, que fixeron del "un autor que se vai converter no centro do canon teatral galego, mais tamén do peninsular e europeo do século XX".

Anxo Abuín, Comba Campoy, Mónica Camaño e Inma López Silva
Anxo Abuín, Comba Campoy, Mónica Camaño e Inma López Silva


A continuación, as actrices Mónica Camaño, Comba Campoy e o profesor da Universidade de Snatiago de Compostela, Anxo Abuín, formaron parte dunha mesa redonda na que analizaron a obra do dramaturgo compostelán desde diversas perspectivas. Así, Mónica Camaño resumiu cunha cita de Vidal Bolaño a natureza do seu proxecto: "Escribo por non estar calado, por amolar,para que non duren tanto certos silencios". Comba Campoy, pola súa parte, relatou a súa experiencia da posta en escena dunha colectánea de textos "bolañianos", mentres que o profesor Abuín centrou a súa intervención na análise da influencia do cine na obra do dramaturgo compostelán.

Imaxe do público asistente
Imaxe do público asistente

Dicionario
Axenda de actos Ver todos
Martes 21 de novembro de 2017 / 17:00 h
Simposio Carlos Casares
Mércores 22 de novembro de 2017 / 17:00 h
Simposio Carlos Casares
Xoves 23 de novembro de 2017 / 17:00 h
Simposio Carlos Casares
Sábado 2 de decembro de 2017 / 12:00 h
Ingreso de Marina Mayoral como académica de honra da RAG

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar