Reedición de 'Galicia como tarea'

Coincidindo coa celebración do Día do Libro, tivo lugar en Vigo a presentación dunha reedición facsimilar de Galicia como tarea; o libro no que Valentín Paz Andrade analiza, desde un punto de vista económico, a situación da Galicia do seu tempo.

No acto, celebrado no edificio administrativo da Xunta de Galicia en Vigo o pasado 23 de abril, Día Mundial do Libro, interviñeron o presidente da Xunta de Galicia, Alberto Núñez Feijoo, o da Real Academia Galega, Xosé Luís Méndez Ferrín, o presidente do Consello da Cultura e membro numerario desta institución, Ramón Villares Paz, e Alfonso Paz Andrade, fillo do homenaxeado.

O presidente da Xunta destacou no seu discurso a importancia que Paz Andrade lle outorgaba, non só ás institucións e tecido industrial do país, senón tamén á cultura galega como medio para acadar a nosa supervivencia como pobo diferenciado.

O presidente da Academia, pola súa parte, subliñou na súa intervención a importancia de Vigo na conformación do ideario político e económico de Paz Andrade. "Aquí naceron as grandes empresas e as grandes sínteses ideolóxicas. Aquí se fixeron as grandes propostas de renovación e transformación de Galicia". E sobre o libro a debate comentou, "en Galicia como tarea é onde Valentín Paz-Andrade propón unha Galicia dona de si mesma, mais non pode selo se non o é tamén economicamente".

Ramón Villares, presidente do Consello da Cultura, destacou a orixinalidade do libro de Paz Andrade ao vincular "a situación económica de Galicia co contexto das novas economías rexionais do momento; coa oportunidade de ter novas fontes enerxéticas, coa combinación de fontes de financiamento públicas e privadas". E puxo de relevo a análise pazandradiana da cultura galega como factor económico pola súa capacidade para nos conectar co mundo lusófono.

Alfonso Paz Andrade deulle o albaroque á xornada agradecendo o nomeamento do seu pai como figura homenaxeada do Día das Letras 2012, un evento que vén a reparar o longo silencio e esquecemento desta figura clave na evolución da literatura e o pensamento galegos.

Outras producións editoriais
Ademais da citada reedición de Galicia como tarea a cargo de Xerais, foron aparecendo nestes días outras producións editoriais sobre da figura do intelectual pontevedrés. Neste sentido encontramos a longa entrevista con Tucho Calvo: Valetín Paz Andrade, a memoria do século XX, reeditada por Biblos. A investigadora Charo Portela propón as seguintes aproximacións: Valentín Paz-Andrade. Escritor, xornalista e poeta. Avogado, político e empresario, publicada en Ir Indo; Valentín Paz Andrade. Biografía e antoloxía, a cargo de Xerais e orientada ao público infantil; e Valentín Paz Andrade, vida e obra, desta volta concibida para o público adulto e tamén publicada por Xerais. Galaxia, pola súa banda, presentou dous libros asinados por Xan Carballa: Biografía de Valentín Paz Andrade e Antoloxía, unha selección de textos do prolífico autor pontevedrés.

Dicionario
Axenda de actos Ver todos
Mércores 20 de decembro de 2017 / 19:30 h
Acto literario e musical co gallo do 110 aniversario da estrea do Himno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar