O galego protagonizará a apertura da Small Cinemas Conference da man de Margarita Ledo

A lingua galega será a protagonista da apertura da Small Cinemas Conference, cuxa oitava edición terá lugar en Euskadi do 20 ao 22 de setembro baixo o título "Diversidade nos cines glocais: linguaxe, cultura, identidade". A académica Margarita Ledo impartirá a conferencia inaugural, dedicada ao cinema en linguas non hexemónicas, na que presentará a investigación que dirixiu sobre o dereito á versión orixinal subtitulada para que a dobraxe non silencie a lingua orixinal e achegará unha mostra do Novo Cinema Galego. Con esta e outras intervencións incluídas no programa, o congreso dá un paso moi significativo no recoñecemento dos dereitos das linguas minoritarias e minorizadas desde o eido das industrias culturais.
Margarita Ledo. Autor: Xosé Castro / RAG

Margarita Ledo Andión abrirá o día 20 de setembro, co relatorio "Repensando a diversidade: cinema en linguas non hexemónicas como síntoma", a Small Cinemas Conference (Congreso Internacional de Pequenas Cinematografías), unha cita posta en marcha en 2010 por académicos e académicas de distintos países que estudan cinematografías con pouca visibilidade. A Universidade do País Vasco UPV/EHU organiza a edición deste ano, que terá lugar en Bilbao e Donostia.

Ademais de ofrecer unha mostra do Novo Cinema Galego, Margarita Ledo reflexionará sobre a falta de medidas de apoio ao cinema en linguas minorizadas desde a UE, que suporía o desenvolvemento dunha política europea de financiamento específica para estas cinematografías ou a creación dun mercado e dunha marca de comunidades con linguas minorizadas. Neste contexto, afondará no proxecto de investigación "Intangible Cultural Heritage: For a European Programme for Subtitling in Non-Hegemonic Languages", que dirixe como catedrática de Comunicación Audiovisual da Universidade de Santiago de Compostela, e no que tamén participa o profesor e académico Henrique Monteagudo. O traballo conclúe que apostar pola versión orixinal subtitulada ten un impacto positivo tanto no acceso á mobilidade internacional das películas feitas en linguas minorizadas como na consideración do local como un elemento central nun xeito diferente de entender a diversidade europea, salienta a académica.

O 22 de setembro, cadrando coa apertura do Donostia Zinemaldia/Festival de San Sebastián, Margarita Ledo participará na mesa redonda sobre pequenas cinematografías, festivais de cine e mobilidade internacional que lle porá o ramo ao congreso. Xunto a ela profundarán nesta relación Ib Bondebjerg, profesor emérito do Departamento de Medios, Cognición e Comunicación da Universidade de Copenhague, e Dina Iordanova, catedrática de Estudos Cinematográficos da Universidade de Saint Andrews (Escocia).

Dicionario
Axenda de actos Ver todos
Sábado 23 de setembro de 2017 / 12:00 h
Ingreso de Chus Pato como académica numeraria da RAG - Ourense
Sábado 30 de setembro de 2017 / 9:30 h
II Xornada de onomástica galega: Os nomes e apelidos - Museo de Pontevedra

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar