O Dicionario incorpora a busca directa de palabras polo feminino

O Dicionario da Real Academia Galega permite desde hoxe buscar directamente as palabras con variación xenérica pola forma en feminino, tanto a través da páxina web da RAG como do Portal das Palabras. A Academia responde así a unha demanda reiterada por parte dos usuarios e usuarias despois de poñer a proba esta novidade no DicionarioLab, un novo espazo web que funciona como auténtico laboratorio de probas, aberto á participación colectiva, de todas as novidades e melloras que se incorporarán ao Dicionario.

O proxecto de colaboración entre a Real Academia Galega e a Fundación Barrié en materia lexicográfica puxo en marcha DicionarioLab o pasado 8 de marzo, Día Internacional da Muller, animando os seguidores e seguidoras a experimentar coa utilidade de procuras polo feminino. Ata o momento, cando se introducía no Dicionario un termo en feminino naquelas palabras con variación xenérica (substantivos e adxectivos) a resposta remitía ao lema en masculino. Por exemplo, ao procurar a palabra muiñeira respondíase "Véxase muiñeiro". Coa actualización que estrea hoxe, o Dicionario ofrecerá directamente a definición do lema feminino.

Tras avaliar con éxito esta novidade, DicionarioLab estrea hoxe outra proba que permite experimentar coa procura de palabras por categorías gramaticais, moi demandada por lingüistas e outros colectivos profesionais como o da tradución. Poderase así buscar palabras escollendo entre as clases que sinalan a maioría das gramáticas xerais: substantivo, verbo, adverbio, adxectivo, artigo, contracción, conxunción, demostrativo, exclamación, indefinido, interrogativo, interxección, locución, numeral, participio, posesivo, preposición, pronome e relativo. Poderase concretar tamén o xénero e mais outras especificacións de categoría (como o tipo de locución) ou sintácticas (por exemplo, verbos transitivos, intransitivos ou pronominais).

Dicionario
Axenda de actos Ver todos
Mércores 20 de decembro de 2017 / 19:30 h
Acto literario e musical co gallo do 110 aniversario da estrea do Himno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar