Gonzalo Enríquez Veloso sobre Vidal Bolaño

Gonzalo Enríquez Veloso (A Coruña, 1985) é doutorando na UDC na área da Teoría da Literatura e Literatura Comparada, ademais de ser autor de varios documentais. Acaba de publicar o libro-DVD Un chapeu negro e un nariz de pallaso. Tras os pasos de Roberto Vidal Bolaño (Galaxia, 2013), e dende maio estará dispoñible na TVG o seu último documental: Recuperando a Roberto Vidal Bolaño.
Gonzalo Enriquez Veloso
Gonzalo Enriquez Veloso. (S.Teijelo)

Que características definen, ao seu ver, a obra de Vidal Bolaño?
A grandes trazos, as máis salientables e relevantes coido que son as seguintes. Primeiramente o realistas e próximas que son as súas personaxes, até nas obras máis simbolistas, os diálogos amosan personalidades cotiás e os seus carácteres fanos próximos ao espectador. En segundo lugar, os seus temas xiran en torno á realidade galega, centrándose nas historias dos perdedores, das vítimas, dos impotentes, do pobo... A terceira característica é a súa inquedanza por crear un novo teatro galego: sendo coñecedor dos devanceiros, tráeos aos seus textos facendo dialogar ao pasado co presente para poder construír un futuro posible para Galiza e para o novo teatro, innovador, profesional, un teatro que exista por si mesmo e coa lexitimidade que outorgan unha cultura e unha sociedade modernas. Por último, como autor do seu tempo, un tempo onde existe o cinema, e como admirador del, introduce aspectos cinematográficos na súa dramaturxia que podemos achar no ritmo, nos tempos das escenas e na forma de contar.

Que importancia tivo a súa figura –como autor, director e actor- na constitución do teatro galego moderno?
A súa intención de modernizar o teatro afecta a tódolos ámbitos. Había un teatro amateur, feito por xente nos ratos libres. Mais el cría nun teatro profesional, serio, formal, decente e moderno, así que deixa o seu traballo fixo e seguro e arríscase e ponse á vangarda, fundando a primeira compañía profesional. Viviu os tempos -que están a volver- do coller a furgoneta e levar os materiais, o vestiario, fabricar bonecos e monicreques, montar o decorado, montar a iluminación, actuar e, claro, escribir a obra e dirixila. Posteriormente, influíu para crear o Centro Dramático Galego. No tratamento dos temas, escollendo a realidade social galega, os problemas, facendo crítica social, etc., está a loitar a prol dunha nova sociedade máis xusta, porque entende que esa é a función do teatro. Investiga na innovación de aspectos formais, como a iluminación ou a posta en escea, tratando o teatro como un teatro nacional (que é o que pretende ser) e facéndoo un teatro posible.

Que vixencia conserva a súa obra no contexto actual?
En realidade a súa obra non pode estar xa descontextualizada: pasaron menos de corenta anos dende o seu primeiro texto e escasamente dez do derradeiro. Ademais, a obra en xeral de Bolaño trata a sociedade e os temas humanos que sempre interesan, como a morte, o amor, o fracaso ou o poder. Perdemos un xenio moi noso e semella que non hai ninguén que siga os seus pasos. Son estes dous, duros golpes que sufriu o teatro coa súa marcha.

Dicionario
Axenda de actos Ver todos
Sábado 23 de setembro de 2017 / 12:00 h
Ingreso de Chus Pato como académica numeraria da RAG - Ourense
Sábado 30 de setembro de 2017 / 9:30 h
II Xornada de onomástica galega: Os nomes e apelidos - Museo de Pontevedra

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar