Un repaso ao labor editorial de Casares desde Vigo

Vigo, a urbe desde a que Carlos Casares exerceu como editor, acolleu este xoves 9 de novembro a segunda das xornadas sobre a súa figura organizadas pola fundación que preserva o seu legado e coas que deu comezo un mes centrado na análise da vida e da obra do protagonista do Día das Letras Galegas 2017. O labor do escritor á fronte de Galaxia foi o eixe dunha mesa redonda na que se destacou o papel que xogou non só na modernización deste selo nado en 1951 senón de todo o tecido editorial galego.

Xavier Casares, Abel Caballero e Víctor F. Freixanes inaugurando a xornada. Fonte: Fundación Carlos Casares


O presidente da Fundación Carlos Casares, Xavier Casares, o presidente da Real Academia Galega, Víctor F. Freixanes, e o alcalde de Vigo, Abel Caballero, inauguraron a xornada que se desenvolveu na Casa Galega da Cultura de Vigo, a cidade que se converteu nos anos 80 na capital da edición de Galicia, lembrou o rexedor. Deseguido, a xornalista María Xosé Porteiro moderou unha mesa redonda con achegas do escritor e tradutor Francisco Xavier Senín, o director xeral de Xerais, Manuel Bragado, e o responsable de produción de Galaxía, Xosé Soutullo.


Pola esquerda, Xosé Soutullo, Manuel Bragado, María Xosé Porteiro e Francisco Xavier Senín. Fonte: Fundación Carlos Casares


Francisco Xavier Senín, membro durante un tempo do equipo de Galaxia, realizou unha viaxe pola literatura infantil e xuvenil galega e a contribución a esta de Carlos Casares. A editorial que dirixiu entre 1986 e 2002 fora xa pioneira na aposta polo libro galego para o público máis novo acubillando títulos de Xohana Torres ou Bernardino Graña, pero con Casares á fronte déuselle un importante pulo a estas publicacións. Con el creouse a colección Árbore -da que foi responsable María Victoria Moreno, a escritora que será homenaxeada o Día das Letras Galegas 2018- e con el impulsouse tamén a tradución de clásicos internacionais como O principiño ao galego, vertido á nosa lingua por el mesmo.

Manuel Bragado, responsable de Xerais (fundada en 1979 en Vigo), referiuse á tensión creativa entre este selo e Galaxia nos anos 80, unha tensión creativa compatible coa colaboración entre ambas as editorais, conscientes de que o libro é un dos factores que fan cidadanía galega. Así foi como saíu adiante a Biblioteca 120, proxecto no que se detivo. Esta colección reeditou 120 títulos da literatura galega distribuídos por La Voz de Galicia para conmemorar os 120 anos da cabeceira. O seu éxito desbordou as previsións, cualitativas e tamén de negocio, tanto para o xornal como para as editoriais.

Xosé Soutullo percorreu os 16 anos de Carlos Casares á fronte de Galaxia, desde 1986 ata o seu pasamento no 2002. Neste período, a editorial, salientou, deixou de ser o suxeito de resistencia testemuñal que fora durante a ditadura, acometeu un importante proceso de modernización e pasou a competir no mercado. Ademais de lle prestar atención aos textos, Casares tampouco esqueceu outros elementos como o deseño do libro, contando con figuras como Manuel Janeiro para o deseño de cubertas.

O académico Xesús Alonso Montero foi o encargado de pechar o programa cunha conferencia sobre o pensamento político de Carlos Casares nos seus anos de mocidade na que recordou a admiración que este sentía naquel momento por Ernesto Che Guevara, a quen chegou a dedicarlle uns versos elexíacos.

Dicionario
Axenda de actos Ver todos
Martes 21 de novembro de 2017 / 17:00 h
Simposio Carlos Casares
Mércores 22 de novembro de 2017 / 17:00 h
Simposio Carlos Casares
Xoves 23 de novembro de 2017 / 17:00 h
Simposio Carlos Casares
Sábado 2 de decembro de 2017 / 12:00 h
Ingreso de Marina Mayoral como académica de honra da RAG

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar