Sobre a designación da personalidade literaria do Día das Letras Galegas

No día de hoxe o presidente da Real Academia Galega recibiu, tal e como fixeron público distintos medios de comunicación, a unha comisión, presidida polo señor alcalde de Ferrol, para "defender a candidatura" de don Ricardo Carballo Calero como o protagonista do Día das Letras Galegas de 2017. Unha hora despois (ás 13:00 horas), recibiu a Asociación Cultural Avelino Díaz (Meira) interesada en que o próximo 17 de maio se homenaxee o escritor Avelino Díaz (Órrea, Riotorto, 1897 – Buenos Aires, 1971).

Esta asociación hai días fixo chegar á Academia un volume de 145 páxinas con valiosa documentación sobre o escritor no que expoñen as razóns da súa proposta. A Academia agradece esta achega erudita –xa na Biblioteca da Institución- como agradece canto labor se faga para un mellor coñecemento da vida e da obra de calquera escritor ou escritora; agradece, tamén, que calquera institución galega faga chegar á opinión pública o nome e os méritos de calquera personalidade literaria, sexa ou non galardoada, no seu día, co loureiro do Día das Letras Galegas.

A Academia aclara –como fixo nas entrevistas de hoxe e noutras semellantes de datas anteriores- que o único procedemento para elección da personalidade literaria a quen se dedique o Día das Letras Galegas está recollido no seu Regulamento:

(Capítulo 2, Artigo 7)
Na primeira reunión despois do Día das Letras Galegas, o Plenario da RAG escollerá o persoeiro a quen se lle dedicará esa conmemoración no ano vindeiro. A figura elixida deberá ser autora dunha obra relevante en galego e persoa de calidade cultural e humana que mereza propoñerse como exemplo á sociedade galega de hoxe. En calquera caso deben pasar dez anos entre a súa morte e a designación para ese día. As propostas, razoadas e asinadas por un mínimo de tres académicos, deberán incluírse na convocatoria do Plenario correspondente.

En calquera caso, esta Academia reitera a súa gratitude a canto colectivo estude e espalle o nome de calquera escritor ou escritora, e entende, por outra parte, que sería descortesía non recibir a persoas ou comisións interesadas no labor intelectual de calquera personalidade literaria galega.

Ademais das propostas de designación de Ricardo Carballo Calero, remitida pola Mancomunidade de Concellos da Comarca de Ferrol, o Concello de Ferrol e o Concello de Moeche; e de Avelino Díaz, da Asociación Cultural Avelino Díaz, a Real Academia Galega recibiu estoutras propostas para o Día das Letras Galegas: Xosé Agrelo Hermo (por parte da Asociación Cultural O Xeito, Muros), Florencio Delgado Gurriarán (Concello do Barco de Valdeorras), Victoriano Taibo (Instituto de Estudos Miñoranos, Gondomar), Francisco Vales Villamarín (Concello de Betanzos), J. Antonio Saco Arce (proposta a través de Change.org), Tomás Antonio Pereiras Gómez (Concello de Vedra), Carlos Casares (Concello de Xinzo de Limia), Antonio Fernández e Morales (Comisión Cultural Martín Sarmiento e Grupo As Médulas para a Lingua e Cultura galegas do Bierzo) e Xosé Manuel López "Ardeiro" (Concello de Negreira).

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar