O presidente da RAG reúnese co titular da Xunta de Galicia

O presidente da Real Academia Galega reuniuse onte en San Caetano co presidente da Xunta de Galicia. A visita a Alberto Núñez Feijoo, a primeira de carácter institucional de Víctor F. Freixanes desde que foi elixido responsable da RAG o pasado 28 de marzo, foi un encontro "cordial" no que se falou de defensa da lingua e da posibilidade de desenvolver proxectos concretos a prol do seu estudo, uso e difusión. "Atopamos unha boa disposición que agradecemos", asegurou tras o encontro.

Pola esquerda, a arquiveira-bibliotecaria da RAG, Fina Casalderrey, o presidente da RAG, Víctor F. Freixanes; o presidente da Xunta de Galicia, Alberto Núñez Feijóo; e o conselleiro de Cultura, Román Rodríguez, en San Caetano. Na recepción tamén participaron o secretario da RAG, Henrique Monteagudo; e o vicesecretario, Andrés Torres Queiruga. Fonte: Xunta


Na xuntanza tamén participaron o conselleiro de Cultura, Román Rodríguez, e os membros da comisión executiva da Academia Henrique Monteagudo, Fina Casalderrey e Andrés Torres Queiruga. Víctor F. Freixanes puxo o acento no compromiso da Academia para traballar na procura de maiores sinerxías coa cidadanía. "A lingua é dos falantes. A RAG é depositaria dunha memoria histórica que ten obriga de manter e desenvolver, con proxectos e iniciativas nas que debemos implicar o conxunto da sociedade civil. Un dos nosos compromisos é conectar coa sociedade galega para facela consciente da importancia dun patrimonio como é o idioma propio", expresou tras o encontro.

Nesta liña, recordou que para que a Academia poida desenvolver o seu labor a prol da lingua e da cultura galegas o seu orzamento "necesita reforzarse, con axudas públicas e con apoios da sociedade civil". Como exemplo dos traballos que realiza, referiuse ao Dicionario, unha ferramenta en constante actualización que recibe cada día máis de corenta mil consultas. O responsable da RAG explicou que o orzamento anual da RAG é notablemente inferior aos da Euskaltzaindia e o Institut d'Estudis Catalans.

A comisión executiva da RAG continuará o vindeiro luns, 8 de maio, a rolda de entrevistas institucionais cun encontro no Pazo do Hórreo co presidente do Parlamento de Galicia, Miguel Ángel Santalices.

Dicionario
Axenda de actos Ver todos
Martes 21 de novembro de 2017 / 17:00 h
Simposio Carlos Casares
Mércores 22 de novembro de 2017 / 17:00 h
Simposio Carlos Casares
Xoves 23 de novembro de 2017 / 17:00 h
Simposio Carlos Casares
Sábado 2 de decembro de 2017 / 12:00 h
Ingreso de Marina Mayoral como académica de honra da RAG

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar