Antonio García Teijeiro gaña o Premio Nacional de Literatura Infantil e Xuvenil con "Poemar o mar"

Antonio García Teijeiro (Vigo, 1952) é o gañador da última edición do Premio Nacional de Literatura Infantil e Xuvenil co libro Poemar o mar (Xerais, 2016). Este é o sexto galardón do Ministerio de Cultura na modalidade LIX que recae nun título en lingua galega e o segundo que premia unha obra de poesía dirixida ao público máis novo.

Antonio García Teijeiro. Fonte: AELG


O xurado destaca que Poemar o mar é un libro "cargado de emoción, cunha brillante elección léxica, onde o mar é o gran protagonista, poboado de criaturas que transitan por orixinais e suxerentes composicións poéticas".

Este galardón súmase a outros recoñecementos previos da obra do escritor vigués, mestre de profesión. En 1996 gañou o Premio Merlín con Na fogueira dos versos, libro co que entrou na Lista de Honra do IBBY (1998), e en 1998 un xurado internacional concedeulle o Premio Europeo Pier Paolo Vergerio, promovido pola Universidade de Padua, un dos máis prestixiosos galardóns literarios de Europa.

O novo recoñecemento á literatura de Antonio García Teijeiro é o sexto Premio Nacional de Literatura Infantil e Xuvenil para unha obra escrita en galego. Paco Martín acadou en 1996 con Das cousas de Ramón Lamote o primeiro e seguíronlle os conseguidos por Cando petan na porta pola noite, de Xabier P. Docampo; Os misterios dos fillos de Lúa, de Fina Casalderrey (1996); O único que queda é o amor, de Agustín Fernández Paz (2008); e Escarlatina, a cociñeira defunta, de Ledicia Costas (2015).

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar