A xeomorfoloxía na RAG da man de Uxío Torre Enciso

A Semana da Ciencia deu lugar estes días unha chea de actividades de divulgación científica por toda Galicia. A Real Academia Galega tamén celebra esta iniciativa coa publicación dixital do discurso de ingreso na institución do xeólogo Uxío Torre Enciso (A Coruña, 1908 - Ferrol, 1994), Avanzos no coñecimento da xeomorfoloxía de Galicia, e a resposta que lle deu en nome da institución Isidro Parga Pondal, con quen colaborou intensamente como membro do Laboratorio Xeolóxico de Laxe. A obra de Torre Enciso abriu novos vieiros no estudo do proceso de alteración das rochas graníticas e realizou notables achegas ao coñecemento xeomorfolóxico do solo galego. Foi tamén pioneiro en anunciar o papel da erosión fluvial na formación do relevo somerxido das rías e o primeiro investigador de restos fósiles do cuaternario de Galicia, dous molares de mamut aparecidos nunha canteira de Buxán (Lugo).
Uxío Torre Enciso

Uxío Torre Enciso ingresou na RAG o 24 de outubro de 1970, a proposta de Isidro Parga Pondal, Antonio Fraguas Fraguas e Luís Iglesias Iglesias, nunha cerimonia celebrada no paraninfo do daquela Instituto de Ensino Medio Feminino da Coruña. A súa intervención daquel día arrincou salientando a "ampla variedade de aspeitos e paisaxes" de Galicia, "unha ricaz paisaxística, estudada con grande acerto e fina sensibilidade por Don Ramón Otero Pedrayo" que, advertía, "non é somentes produto do seu tapiz vexetal sempre verdecente, senón tamén o resultado da atraente e orixinal aicidentación que o seu releve amosa, tanto no interior como no seu incomparable litoral".

O científico, tras abordar aspectos como a meteorización na modelaxe do relevo terrestre, o desenvolvemento das superficies de erosión ou a orixe das rías galegas, rematou o discurso apelando á preservación natural: "Non sabemos de certo cál vai ser o porvir xeolóxico de Galicia, mais xa se escrarecéu un bo quiñón da longa historia evolutiva do seu ricaz tesouro de finas paisaxes e formas de releve que é mester amparar e gardar como sagra herdanza que ten de ser legada ás xeneracións vindeiras; pois a máis de constituir un recurso natural de primeira orde, que compre conservar e no posibre potenciar, son parte primacial do contorno no que fomos modelados dende nenos, e arelamos seguir recoñecendo nelas o souril e inconfundibre semblante da nosa terra nai".

Dicionario
Axenda de actos Ver todos
Mércores 20 de decembro de 2017 / 19:30 h
Acto literario e musical co gallo do 110 aniversario da estrea do Himno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar