A poesía de Xohana Torres regresa cunha nova homenaxe á súa avoa

A homenaxe de Xohana Torres á súa avoa, que protagonizara parte de Estacións ao mar(1980), volve trinta e seis anos despois ás librarías nunha nova versión ampliada e enriquecida na que saen á luz versos da escritora por primeira vez desde Poesía reunida (1957-2001). A nova Elexías a Lola inclúe poemas inéditos xunto a un fragmento do discurso de ingreso da poeta na Real Academia Galega, no que tamén tivo palabras, e versos, de recordo para a muller da que herdou a fala e a sabedoría popular.
Xohana Torres retratada por Laxeiro.

A poeta e xornalista Ana Romaní e os tamén xornalistas Xan Carballa e Carme Vidal presentaron onte, na libraría Couceiro de Santiago de Compostela, Elexías a Lola (Engaiolarte, 2016), unha coidada edición supervisada persoalmente por Torres e realizada, man con man, co seu amigo o editor Xosé Fernández Puga. Carballa foi o encargado de darlle voz pública ás impresións da propia autora sobre o libro, o primeiro da Biblioteca Xohana Torres, na que se pretende reeditar toda a súa obra e textos inéditos. Segundo explicou, a escritora non tiña pensado volver publicar poemas, pero aceptou a proposta de Puga e sentiu de novo que quería escribir sobre a súa avoa, renderlle unha homenaxe en forma de libro por todo o que influíu e significou na súa vida.

Os doce poemas novos de Elexías a Lola situánse entre os versos publicados en 1980 abrindo novas lecturas, diversificándose "en cartografías que na observación do tempo perfilan outros contornos", expresou Ana Romaní. "Participamos dun reencontro poético inusual: o da voz poética consigo mesma tres décadas despois", engadiu a xornalista, para quen o corpus literario da autora demostra unha gran solidez que "alén de contextos xeracionais, estende a súa pegada plena e cómplice nas poéticas últimas nas que a súa voz resoa".

A edición inclúe un anaco de Eu tamén navegar, o discurso co que Xohana Torres ingresou na RAG no ano 2001, "polo seu interese biográfico e contextualizador". A autora inscribe a Lola "na estirpe de avoas primixenias, de austera e miúda arquitectura, gardiás dunha lingua secular" neste texto "entusiasta e intenso", en palabras de Carme Vidal, que definiu a Torres como "unha das máis grandes escritoras galegas de todos os tempos" e confiou en que, tras este regreso, siga a producir máis obras.

Elexías a Lola tamén reproduce un retrato de Xohana Torres realizado por Laxeiro e, por primeira vez, o da avoa Lola que pintou Segura Torrella seguindo a descrición da neta.

Dicionario
Axenda de actos Ver todos
Xoves 14 de decembro de 2017 / 20:00 h
'Eduardo Pondal, poeta na Coruña', conferencia de Manuel Ferreiro
Mércores 20 de decembro de 2017 / 19:30 h
Acto literario e musical co gallo do 110 aniversario da estrea do Himno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar